25年前，人民南路嘅状元坊，人头涌涌，90年代，可以话係“状仔”最兴旺嘅时候。但如今，呢条陪伴我哋广州人成长嘅老街已经辉煌不再，只剩萧条……

宜家嘅状元坊，接近2/3店铺都关门冇做生意，唔係贴住店铺转让，就係店铺招租，只剩低零星几间继续营业。

喺状元坊已经开铺十几年嘅翁婆婆话，宜家嘅状元坊已经今非昔比，“以前人多好旺，万几蚊（一个月）间铺都有人租，好快就可以回本。但係宜家，月租2000蚊都冇人要。”语气之中充满浓浓可惜同无奈。

呢条长200几米嘅麻石小巷，曾经承载住我哋几多人嘅回忆，特别係80后、90后，每到放假，边个唔係话要去“状仔”行街食嘢噶。

人生第一次影嘅贴纸相，好容易撞衫嘅爆款，三四十蚊一个书包，十蚊八对卡通袜，古灵精怪嘅文具，耳环耳钉……宜家仲剩得几多。

昔日嘅潮人胜地，宜家更多嘅係意味住一条3分钟就可以穿过嘅巷仔，不禁令人唏嘘惋惜。

因为生意差，近几年，好多店铺都纷纷“关门”。好似一入状元坊牌坊嘅嗰间M记，曾经多人到永远都要揾位，但係宜家已经退出咗状元坊。

状元坊嘅衰落，有自身原因，亦都有城市发展嘅原因。内部环境简陋，冇空调，地方狭窄污糟，好多人都觉得行呢度不如去天河城、中华广场嗰D大商场。

相比繁盛时期砵仔糕、甜酸、柠檬车仔红茶同双皮奶等广州特色美食，如今状元坊主道内已没有任何食肆。附近100米内唯一一家便利店都已经倒闭。只剩低两间奶茶饮料店同重庆麻辣烫、酸辣粉、老鸭粉丝店依然迎合住新兴外地人嘅口味。

状元坊，一个承载住无数广州人回忆嘅地方，早已冇咗昔日人潮涌涌嘅热闹，冇咗潮流新品嘅精致，冇咗纯粹地道嘅广州美食。宜家，佢正处于“执笠”嘅煎熬中。

我哋要用乜嘢嚟记住你，曾经嘅状元坊……

版权声明：本文部分图片来源网络，由本微信平台“广州笋嘢益街坊”原创整理，请尊重知识产权，未经授权谢绝抄袭，转载请注明出处！